Showing posts with label siddha medicine. Show all posts
Showing posts with label siddha medicine. Show all posts

Wednesday, January 2, 2013

மருத்துவ உலகின் ரஜினி : தெய்வநாயகம். (C .N .D )

தெய்வநாயகம் அவர்களை ரஜினியுடன் ஒப்பிடுவதை அவரை நன்கு அறிந்தவர்கள் ஏற்றுக்கொள்ள மறுப்பார்கள் என்று தெரியும் ,இருப்பினும் இரண்டு வருடம் அவருடன் மருத்துவ உலகில் இருந்த பொழுது நான் கவனித்ததில்   நடை,உடை,ஸ்டைல் என அனைத்திலுமே  எனக்கு  அவர் சூப்பர் ஸ்டாராகவே தெரிந்தார்.

கடந்த வருடம் நவம்பர் மாதம் இறந்து விட்ட அவரைப் பற்றி பெரும்பாலான  ஊடங்களில் குறிப்பிட்டிருந்தாலும் அவற்றில்  எல்லாம் குறிப்பிட மறந்துவிட்ட அல்லது மறைக்கப்பட்ட செய்திகளை உங்களுடன் பகிர்ந்து கொள்ள விரும்புகின்றேன்.

 அனைவருமே அறிந்த ஒன்று சென்னை மருத்துவக் கல்லூரியில் படித்த அவர் கல்லூரியின் சிறந்த மாணவர் என்ற விருதுடன் படிப்பினை முடித்து இங்கிலாந்தில் நெஞ்சக் நோய் தொடர்பான மேற்படிப்பைப் படித்தார். இதில்  குறிப்பிடத்தக்க ஒன்று சென்னை மருத்துவக் கல்லூரியில் அவருடைய வகுப்புத் தோழர் அரசியல் தலைவர் மருத்துவர் ராமதாஸ் .அந்த நட்பே மக்கள் தொலைக்காட்சியில் தெய்வநாயகம் அவர்கள் மருத்துவ நேரம் நிகழ்ச்சியினை  தொடர்ந்து நடத்தி அனைத்து மக்களையும் அவர் சென்றடைய வழிவகுத்தது.
 
ரஜினியுடன் ஒப்பிட முக்கியக் காரணங்கள்:
 உடல் நலம் குன்றும் முன்பு வரை அவரின் நடை மிகப் பிரசித்தம். அவ்வளவு வேகமாக இரு கைகளையும் வீசி நடந்தால் புயல் கடந்தது போல இருக்கும்,அதுவும் தி .நகரில் உள்ள நடேசன் பூங்காவில் அதிகாலை நான்கு மணிக்கு நடைபயணம் செய்வதை வழக்கமாகக் கொண்டிருந்த அவர் "உடம்பை வளர்த்தேனே உயிர் வளர்த்தேனே"   என்ற திருமூலரின் வாக்குப் படி உணவுப் பழக்க வழக்கம் ,உடற் பயிற்சி என்றவற்றை மிகத் தவறாமல் கடைப்பிடித்து வந்தார்.

ரஜினியின் பஞ்ச் வசனம் எவ்வளவு புகழ் பெற்றதோ எந்தளவு மறக்க முடியாதோ அந்தளவு நமது மருத்துவரின்  ஒவ்வொரு பேச்சும் மறக்க முடியாத அளவு மிகத்  தெளிவாகவும் கேட்பவர் தன வாழ்நாள் முழுவதும் மறக்க முடியாத அளவுக்கு கூறுவார். இதனை அவரிடம் படித்த  மாணவர்களும் ,அவருடைய நோயாளிகளும் நன்கு அறிவர்.
கடமையில் அவருடைய அர்ப்பணிப்பும் ஈடுபாடும் பார்க்கவரை  வியக்கவைக்கும்.

அதற்கு  இரண்டு முக்கிய நிகழ்வுகளைக் கூறலாம். ஆண்டும் ,குடியரசுத் தலைவரின் பெயரும் நினைவில்  இல்லை ,ஆனால் இது நடந்து சென்னை மருத்துவக் கல்லூரியில்  சென்னை வந்த குடியரசுத் தலைவரை பொது மருத்துவமனையில்  நமது மருத்துவரிடம் அழைத்து வந்தபோது  அவரிடம் நோயாளருக்கான சீட்டினைக் (Out patient reciept ) கேட்டவுடன் உடன் இருந்த அரசு அதிகாரிகள் மிரண்டு விட்டனர். ஆனால் பிடிவாதமாக அந்த சீட்டு வந்தவுடன்தான் மருத்துவம் பார்த்தார்.

இன்னொரு சம்பவம் தாம்பரத்தில் நெஞ்சக நோய் கண்காணிப்பாளராக இருந்தபோது அங்கு மருத்துவ சோதனைக்காக வந்த சுகாதாரச் செயலரை மற்ற நோயாளிகளுடன் வரிசையில் வரச் சொல்லி மருத்துவம் பார்த்தார் .தன்  குடும்ப உறுப்பினர்களுக்கும் இதே நிலை தான் இவருடைய மனைவி ஒரு    முறை மருத்துவமனைக்கு வந்த போதும் இதே நிலைதான். இவற்றை எல்லாம் செய்யும் தைரியம் இருப்பது அவரிடம் இருந்த திறமைதான் முக்கியக் காரணம்.
            http://www.thehindu.com/multimedia/dynamic/01273/Chest_1273633f.jpg
சித்த மருத்துவத்தில் புரட்சி :
உயிர்க்கொல்லி நோய் (AIDS ) உச்சத்தில் காலகட்டத்தில் அவற்றுக்கான தீர்வினை தேடிகொண்டிருந்தபோழுது தனக்குத் தெரிந்த சித்த மருத்துவர்கள் மூலம் சித்த மருத்துவத்தில் அதற்கான தீர்வு ஓரளவு உண்டு என்பதனை உணர்ந்து அலோபதி மருந்துகளுடன் சித்த மருந்துகளையும் வழங்கி கூட்டு மருத்துவ சிகிச்சியினை தொடங்கி வைத்தார். இந்த மருத்துவ சிகிச்சையின் முடிவுகளை தென்னாப்பிரிக்காவில் நடந்த சர்வதேச மருத்துவ நாட்டில் சமர்ப்பித்து சர்வதேச மருத்துவ உலகில்  சித்த மருத்துவத்தைக் கவனிக்கச் செய்தார். சித்த மருந்துகளில் மட்டுமின்றி சித்த மருத்துவ நோய்  கணிப்பு முறைகளின்  மீதும் நம்பிக்கை வைத்து சித்த மருத்துவர்களே நடைமுறைபடுத்த முயற்சிக்காத நீர்க்குறி பரிசொதனையினை தவறாமல் ஒவ்வொரு நோயருக்கும் செய்து  அத்னான் படி மருந்துகள் வழங்கினார்.இது மட்டுமன்றி தேசிய சித்த மருத்துவ நிறுவனத்தில்  பொறுப்பு மிக்க பல பதவிகளில் இருந்த பொழுது அந்த நிறுவனத்தினை அண்ணா மற்றும் சென்னை பல்கலைக்  கழகங்களுடன் இணைந்து ஆராய்ச்சி மேற்கொள்வதற்கான  திட்டத்தினை தொடக்கி வைத்ததில் முக்கியப் பங்கு வகித்தார்.

தமிழ் தேசிய அரசியலில் கவனம்;
நிறையபேருக்கு  தெரியாத உண்மை இவருடைய தாத்தா நீதிக் கட்சியில் முக்கியப் பங்கு வகித்தவர் ,எனவே தனது  தாத்தா வழியில் இவரும் தமிழ் தேசிய அரசியலில் பங்கு வகிக்கத்  தொடங்கினார். இதனால் வேட்டி  சட்டை அணிவதையும் தூய தமிழில் பேசுவதையும் வழக்கமாகக் கொண்டிருந்தார். தமிழ் மொழி தொடர்ப்பான கூட்டங்களுக்காக  தி.நகரில் உள்ள தனது  பள்ளியில் இலவசமாக  இடம் வழங்கினார். ஒவ்வொரு ஞாயிற்றுக் கிழமையிலும் தமிழ் மொழி வளர்ச்சிக்கான கூட்டங்கள் நடத்தி பலதுறை வல்லுனர்களை அழைத்து வந்து சிறப்பித்தார்.
மருத்துவரை  பற்றிக் கூற  இதைப் போன்ற செய்திகள் எண்ணற்றவை இருந்தாலும் மேற்குறிப்பிட்ட முக்கிய நிகழ்வுகள் மூலம் அவரின் சேவை எத்தகைய உன்னதம் வாய்ந்தது என்பதனை உணர்ந்திருப்பீர்கள்  என்று நம்புகின்றேன்.

இவரின் இழப்பு மருத்துவ துறைக்கு மட்டுமன்றி தமிழ் மண்ணுக்கும் தாயகத்துக்கும் ஏற்பட்ட பேரிழப்பு . இத்தகைய  பெருமை வாய்ந்த ஒருவரை சந்தித்ததையும் பழகியதையும் நினைத்தால் மிகவும் நெகிழ்ச்சியாக இருக்கின்றது. தமிழ் கூறும் நல்லுலகம் என்றும் நமது மருத்துவ செம்மலின்  சேவையை நினைவுகூர்தல் கடமையாகும்.

                                              

Saturday, February 25, 2012

கண்டுகொள்ளப்படாத சித்த மருத்துவ மாணவர்களின் போராட்டம்:



      கடந்த பதினைந்து நாட்களாக சித்த மருத்துவ மாணவர்கள் வகுப்புகளைத் தொடங்கக் கோரி தீவிரமாகப் போராடி வருகின்றனர்.டெல்லியில் உள்ள இந்திய மருத்துவ முறைகளுக்கான நடுவண் அமைப்பு (CCIM ) பாளையங்கோட்டையில் உள்ள அரசு சித்த மருத்துவக் கல்லூரியில் அடிப்படை வசதிகள் இல்லாத காரணத்தால் மாணவர் சேர்க்கைக்குத் தடை வித்தித்துள்ளது.

பொதுவாக சித்தமருத்துவ மாணவர்களுக்குப் போராட்டம் என்பதே கல்லூரி வாழ்க்கையின் ஒரு பகுதி  போன்றுதான், மாணவர்களுக்குத்  தேவையானவற்றை அரசாங்ககமோ ,கல்லூரி நிர்வாகமோ செய்து கொடுக்க முயன்றதே இல்லை ,ஒவ்வான்றையும் மாணவர்கள் போராடியே பெற்றனர்.
 முன்பு  சென்னையில் அண்ணா மருத்துவமையின் வளாகத்தில்  அமைந்துள்ள கல்லூரி மற்றும் மருத்துவ மனைக்கு சுற்று சுவரே கிடையாது.அந்தப் பகுதியைச் சுற்றியிருக்கும் மக்கள் தங்கள் கால்நடைகளை மேய்க்கும் இடமாகப் பயன்படுத்தி வந்தனர். இதற்காக மாணவர்கள் பல முறை போராடியும் பலன் இல்லாததால் ஜெயலலிதா முதலமைச்சாராக  இருந்த பொழுது   மிகவும் துணிச்சலாக  அவருடைய வாகனத்தை   மறித்து கோரிக்கை மனுவினை  மாணவர்கள் கொடுத்ததன் காரணமாகவே மருத்துவ மனைக்கான சுற்றுசுவர் கட்டப்பட்டது. இன்று சென்னை மற்றும் பாளையங்கோட்டையில் இயங்கிவரும் அரசு சித்த மருத்துவக் கல்லூரிகளில் ஏற்பட்டிருக்கும் மாற்றங்கள் அனைத்தும் மாணவர்கள்  தீவிரமாகப் போராடிப் பெற்றவையே.

தமிழுக்கும் தமிழருக்கும் பெருமை சேர்க்கின்ற வகையில் சித்தர்களால் படைக்கப் பட்ட மருத்துவத்தினை உலகறியச் செய்யும் பொறுப்பும் கடமையும் தமிழக அரசுக்கு உண்டு, ஆனால் எங்கோ  தோன்றிய ஆயுர்வேதம்,யுனானி,ஹோமியோதி மற்றும் நேச்சுரோபதி போன்ற மருத்துவ முறைகளுக்கு வழங்கப் படும் அதே முக்கியத்துவம் தமிழகத்தில் தோன்றிய தமிழ் மருத்துவத்துக்கும் தமிழ்நாட்டில்  வழங்கபடுவதென்பது ஏற்றுகொள்ள முடியாத ஒன்றாகும்.அண்ணா மருத்துவமனை என்பது சித்த மருத்துவ சிகிச்சையினை மக்களுக்கு வழங்குவதற்காகவே    தொடங்கப்பட்ட  ஒன்று.   அதில்  மற்ற மருத்துவ முறைகளை நுழைத்தன விளைவாகவே  இன்று சித்த மருத்துவம் மக்களிடையே பரவலாக  சென்றடையாமல் உள்ளது.

  அண்ணா மருத்துவ மனை வளாகத்தில் தற்பொழுது சித்த மருத்துவ கல்லூரி மட்டுமின்றி யுனானி மற்றும் நேச்சுரோபதி மருத்துவக் கல்லூரிகளும்  இயங்கி வருகின்றன.சித்த   மருத்துவ பட்டப் படிப்பு மற்றும் பட்ட மேற்படிப்பு போன்றவை நடத்த இடவசதி இன்றி இருக்கும் நிலையில் மற்ற மருத்துவ முறைகளுக்கான கல்லூரி அதே வளாகத்தில் தொடங்க அனுமதி அளித்ததில் இருந்து  அரசாங்கத்திற்கு சித்த மருத்தவத்தின் மேல் இருக்கும் அலட்சியத்தினை புரிந்து கொள்ளலாம்.

தமிழ் மருத்துவத்தினை சீரழிப்பதில் தமிழக அரசு, சித்த மருத்துவ நிர்வாகம்  மற்றும் எம்.ஜி.ஆர். பல்கலைகழகம் மூன்றும்  கூட்டாகவே செயல்படுகின்றன.

  தமிழக அரசாங்கம்  இந்திய  மருத்துவ   முறைகளுக்கான ஆணையத்தின் இயக்குனரை   நியமிக்கும் நடைமுறை இங்கு குறிப்பிடப் பட   வேண்டிய ஒன்று  .  ஜெயலலிதாவோ கருணாநிதியோ யாராக இருந்தாலும் தனக்குப்  பிடிக்காத I A .S .அதிகாரியினை  இந்தத் துறையின் இயக்குனராக  நியமிப்பதுதான் தொன்று தொட்ட  வழக்கம். அவர்களும் ஆட்சி முடியும் வரை இந்தப் பணியினை ஓய்வு நேரமாக கருதி ஒரு உருப்படியான காரியமும் செய்வதில்லை. இருப்பினும் டான்சி வழக்கில் ஜெயலலிதாவிற்கு எதிராக  சாட்சி சொன்னதன் காரணமாக செயலாளர் அந்தஸ்தில் இருந்த பாரூக்கி I.A.S.  அவர்களை   சித்த மருத்துவத்துறையின் இயக்குனராக ஜெ அரசாங்கம் நியமித்தது. இதற்கு முன் இருந்த இயக்குநர்களைப் போன்று கடமைக்கு அலுவகத்திற்கு  வந்து போய்க்கொண்டிருக்காமல் மிகச் சிறப்பாக செயலாற்றி தாம்பரத்தில் தேசிய சித்த மருத்துவ நிறுவனம் தொடங்குவதில் பெரும் பங்கு ஆற்றினார்.

ஆனாலும் இயக்குனர்களை மட்டுமே குறை கூற முடியாது. அவர்கள் தமிழ் மருத்துவத்தின் தொன்மையை முழுதும் அறிந்தவர்கள் அல்ல, அவர்கள் வெறும் நிர்வாகிகள் .  எல்லாமும் தெரிந்த சித்த மருத்துவர்கள் பொறுப்பான பதவிகலீல்  இருக்கும் பொது செய்யும் காரியம் தான் வெட்கக்கேடானது. இன்று அடிப்படை வசதிகள் இல்லாத காரணத்திற்காக  அனுமதி ரத்து செய்யப்பட்டதற்கான முழு பொறுப்பும் இவர்களையேச்  சேரும். ஏனென்றால் அரசாங்கம் உள்கட்டமைப்பு வசதிகளுக்காக வழங்கும் நிதியினை பயன்படுத்தாமல் அரசாங்ககத்திற்கே திருப்பி அனுப்பும் ஒரே துறை நாட்டிலேயே சித்த மருத்துவத் துறையாகத் தான்  இருக்கும். அரசு அளித்த நிதியினை சரிவரப் பயன்படுத்தியிருந்தால் இது போன்றதொரு அவல நிலை வருவதனை தடுத்திருக்க முடியும். இதே நிலை தொடர்ந்து நீடிக்கும் பட்சத்தில் சென்னையில் உள்ள கல்லூரியின் அங்கீகாரமும் விரைவில் பறிபோகும் .எனவே பொறுப்புள்ள பதவிகளில்  இருக்கும் சித்த மருத்துவர்கள் தங்களால் இயன்ற அளவு சித்த மருத்துவத்தினை தரம் உயர்த்திட பாடுபட வேண்டும்.

மூன்றாவதாக  சித்த மருத்துவத்தினை நசுக்குவதில் முழு மூச்சோடு செயல்படுவது எம்.ஜி.ஆர். பல்கலைகழகம் . நான் முன்பு எழுதிய தங்க பற்பம் பற்றிய தவறான புரிதல் குறித்தான  பதிவில் எம்.ஜி .ஆர். அவர்கள் சித்த மருத்துவ முன்னேற்றத்திற்காக பல நல்ல செயல்களை செய்ததது பற்றிக் குறிப்பிட்டிருந்தேன்.ஆனால் அவர் பெயர் தாங்கிய பல்கலைக் கழகம் சித்த மருத்துவத்தை  குழி  தோண்டி புதைப்பதிலேயே குறியாக இருக்கின்றது.பல்கலைக்கழக துணை வேந்தராக வரும் ஒவ்வொருவரும் தங்கள் ஐந்தாண்டு காலதத்தில் தங்களால் இயன்ற அளவு சித்த மருத்துவத்தினை சிறுமைபடுத்துகின்றனர். முதலில் சித்த மருத்துவப் பட்டத்தினை  போலி மருத்துவப் பட்டம் என்று அறிவிக்க முற்பட்டனர்,நீதிமன்றத்தின் தலையீட்டால் அது முறியடிக்கப்பட்டது. எனவே தற்பொழுது சித்தமருத்துவப் படிப்பில் வரும்  நவீன மருத்துவ பாடத்திட்டங்களை நீக்க சதி செய்து வருகின்றனர். அதாவது நவீன மருத்துவ முறைகளை தங்கள்மருத்துவ முறைகளுடன் ஒப்பிட்டு பாரப்பதற்காகவும் , அவசர சிகிச்சை அளிப்பதற்காகவும் படிக்கும் பாடங்களை நீக்க  மிகுந்த ஆர்வம் காட்டுகின்றனர்

 பேருந்து வசதி கூட இல்லாத கிராமங்களில் கூட சித்த மருத்துவர்கள் சிரமம் பார்க்காமல் சென்று தகுதியான  மருத்துவ சிகிச்சையினை வழங்கி வருகின்றனர். நவீன மருத்துவர்கள் எவரும் கிராமங்களில் சேவை செய்ய தயாராக  இல்லாத நிலையில் நோயாளியின் நிலையினைப் பொறுத்து சித்த மருத்துவ  சிகிச்சையுடன் நவீன மருத்துவ சிகிச்சயையினையும் வழங்கி வருவதனை இவர்களால் பொறுத்துக் கொள்ள முடியவில்லை.

தமிழ்   ஊடங்களில் சித்த மருத்துவம் குறித்த செய்திகளை அதிக முக்கியத்துவம் அளித்து வெளிய்டப்படுவதில்லை என்ற வருத்தம்  சித்த மருத்துவர்களுக்கு நீண்ட நாட்களாகவே  உண்டு. சித்த மருத்துவம் தொடர்பான செய்திகளை பத்திரிக்கைகளின் கடைசிப் பக்கத்தில நான்கு வரிகளில் வெளியிட்டு தங்கள் கடமையினை முடித்துக் கொள்கின்றனர். ஐரோப்பாவிலும் அமெரிக்காவிலும் தங்கள் பாரமபரியம் சார்ந்த செய்திகளுக்கு மிகுந்த முக்கியத்துவம் அளித்து செய்தி வெளியிடுகின்றனர்.அவர்கள் நாட்டில் இதனைப்  போன்றதொரு சிறப்புகள் நிறைந்த மருத்துவம் இருந்திருந்தால் உலகின் மூளை முடுக்கெல்லாம் கொண்டு சென்றிருப்பார்கள்.
 பதிவுலகிலும் சமீபத்தில் இதைப்போன்றதொரு  அவல நிலை நடந்தேறியது. கம்யூனிச கருத்துகளை சிறப்பாக எழுதி வரும் கலையரசன் அவர்கள் சித்த மருத்துவம் சீன மருத்துவத்தின் கிளை என்பதனை போன்றதொரு பதிவினை எழுதினார்.  அதற்கு உதாரணமாக அவர் குறிப்பிட்டது  அகத்தியரின் உருவம்,அகத்தியரின் தோற்றத்தில்   குள்ளமாக இருப்பதினால் அவர் சீனாவைச் சார்ந்தவராம் ,அனைவருக்குமே தெரியும் திருவள்ளுவர் ,கண்ணகி மற்றும் சித்தர்கள் படங்கள் போன்றவை கற்பனையாக வரையப் பட்டவை என்பது, எனவே நான் என்னுடைய பதிவில் சித்த மருத்துவத்திற்கும் சீன மருத்துவத்திற்கும் மருந்துகள் தயாரிப்பில் இருந்து நோய் கணிப்பு முதல் எந்த  ஒற்றுமையும் இல்லை என்பதனை தகுந்த ஆதாரங்களுடன்  குறிப்பிட்டிருந்தேன்.

அனைத்து துறைகளிலும்  இருப்பதனைப் போன்றே சித்த மருத்துவர்களிடையேயும் ஒற்றுமை என்பது காணக்கிடைக்காத ஒன்றாகவே இருக்கின்றது. இதுவரை அனைத்து சித்த மருத்துவர்களையும் உள்ளடக்கிய ஒரு வலுவான  அமைப்பு  எனபது உருவாகவே இல்லை. எனவே சித்த மருத்துவம் தொடர்பான கோரிக்கைகள் மற்றும் போராட்டம் அனைத்துமே அதன் முக்கியத்துவத்தினை இழந்து விடுகின்றது.

இன்றைய நவீன உலகில் படித்து முடித்தவுடன் வேலைக்கு செல்லும் பல்வேறு படிப்புகள் இருக்கின்ற நிலையில் சித்த மருத்துவம்  படிப்பதற்காக உண்ணாநிலைப் போராட்டம் மேற்கொண்டிருக்கும் மாணவர்களின் கோரிக்கையினை உடனடியாக நிறைவேற்றி சித்த மருத்துவ வகுப்புகளை தொடங்கக் அரசாங்கம் முயற்சி எடுக்க வேண்டும்.


Wednesday, December 21, 2011

கம்யூனிச கலையரசன் சித்தர் கலையரசனாக மாறியது ஏன்



ஏழாம் அறிவு ஏற்படுத்திய தாக்கத்தினால் பதிவர் `கம்யூனிச` கலையரசன் சித்தர் ஆராய்ச்சியின் பக்கம் தன கவனத்தை திசை திருப்பி தொடர்ந்து தவறான தகவல்களை எழுதி வருகின்றார். அவரின் சமீபத்திய பதிவுகளான அகத்தியர்,திருமூலர் மற்றும் போகர் போன்றோர் தமிழர்களே அல்ல என்றும் குறிப்பாக அகத்தியர் ஒரு சீனர் என்பதற்கு அவர் குறிப்பிடும் மிக முக்கிய உதாரணம் அவர் குள்ளமான உருவ அமைப்பினைக் கொண்டவர் என்பதாகும்.இந்த ஒரு சின்ன உதாரணம் போதும் இவரின் கட்டுரைகள் எவ்வளவு பொய்யான செய்திகளை கொண்டு எழுதப் பட்டிருக்கின்றது என்றும் மிகத் தெளிவாகவே விளங்கும்.

இதற்கு மிகச் சரியான விளக்கம் திருவள்ளுவர் படம்.உலகில் யாருக்குமே திருவள்ளுவர் எப்படி இருந்திருப்பார் என தெரியாது அப்படி இருக்கையில் மிகக் கற்பனையாக வரையப் பட்ட உருவமே தற்பொழுது நம்மிடம் இருக்கும் திருவள்ளுவர் படம். அடுத்து கண்ணகி சிலை ,இதற்கான உருவ அமைப்பும் ஒரு நடிகையினை முன் மாதிரியாகக் கொண்டே உருவாக்கப் பட்டது. இதைப் போன்றே தான் சித்தர்களின் படங்களும், கற்பனையாக வரையப்பட்ட அந்தப் படங்களைக் கொண்டு அவர் சீனர் என்று செய்யும் வாதம் அறிவு முதிர்ச்சி அற்ற வீணர்களின் வேலையாகவேக் கருத வேண்டும். எனினும் இதைப் போன்ற தவறான பரப்புரைகளை வேரறுக்க சித்த மருத்துவத்தின் தொன்மையினையும் அவற்றின் தனிதன்மையினையும் அனைவரும் தெரிந்து கொள்ளும் பொருட்டு எளிய முறையில் உரிய விளக்கங்களுடன் பதிவு செய்து இருக்கின்றேன்.


பொதுவாகவே தமிழகத்தில் தமிழின் மிகப் பெரிய சொத்தாக இலக்கியமே கருதப் படுகின்றது. அதை விடவும் மிக முக்கியமான உயர்ந்த இடத்தில் இருப்பது தமிழர்களின் கண்டுபிடிப்பான சித்த மருத்துவம் என்பது அதனை முழுவதும் அறிந்தவர்களுக்குத் தெளிவாகத் தெரியும். சித்த மருத்துவம் என்பது வெறுமென மருந்துப் பொருட்களின் தயாரிப்பு குறித்து மட்டுமே எழுதியிருப்பதாகவே பலரும் புரிந்து வைத்திருக்கின்றனர். சித்தர்கள் வாழ்வியல முறைகள் மனித உடல் தத்துவ விளக்கங்கள்,அன்றாடம் பேணப்படவேண்டிய ஒழுங்கு முறைகள் பற்றி நாளொழுக்கம் (Personal Hygine) என்று மிக விரிவாகவும் ,உலகம் தோற்றம் பற்றிய குறிப்புகளைப் பற்றியும் மிக தெளிவாக எடுத்துக் கூறியிருக்கின்றனர்.அவற்றில் மிக முக்கியமாக துயில் எழும் நேரம்,பல் துலக்கும் முறை,பருவ நிலைக்கேற்ற உணவு முறைகள் என்று எண்ணிலடங்கா செய்திகளை சொல்லி இருக்கின்றனர்.



அடுத்ததாக நோய் கணிக்கும் முறை : பல்லாயிரம் ஆண்டுகளுக்கு முன்னதாகவே நோய்களை வகை படுத்தியும் அவைகளை கணிக்கும் முறைகுறித்தும் எழுதியவர்கள் சித்தர்கள் மட்டுமாகவே இருக்க முடியும். உதாரணத்திற்கு சுரம் (fever ) 64 வகையாகப் பிரித்து அவை ஒவ்வொன்றுக்கும் எப்படிப்பட்ட குறிகுணங்கள் இருக்கும் என்றும் எழுதி வைத்திருக்கின்றனர். உடம்பில் தோன்றும் மொத்த நோய்களின் எண்ணிக்கை 4334 என்று உறுதி பட கூறிய மருத்துவம் உலகிலேயே சித்த மருத்துவம் மட்டும்தான். இப்படி நோய்களை வகைபடுத்திய்தோடு மட்டுமின்றி எந்த வகையான் நோய் மருந்தினால் தீர்க்க முடியும் எந்த வகையான நோய் மருந்தினாலும் குணப் படுத்தவே முடியாது என்றும் குறிப்பிட்டு பழங்காலத்திலேயே மருத்துவ இயலின் எல்லையினையும் ஒளிவு மறைவின்றி உலகுக்கு சொன்ன மருத்துவம் சித்த மருத்வமாக மட்டுமே இருக்க முடியும்.


நோயை வகைப் படுத்தியவர்கள் அதனை கணிக்கும் முறைகுறித்து மிக எளிய சோதனைகளில் விளக்கி இருக்கின்றனர். குறிப்பாக நோயாளின் உமிழ்நீர் விழும் அளவினை பொருத்தும், சிறுநீரில் எண்ணையினை சிறிதளவு விடும் பொழுது ஏற்படும் தோற்றங்களிலிருந்து அது வாதம் சார்ந்த நோயா அலது பித்தம் சார்ந்த நோயா என்றும் வகைப் படுத்தி இருக்கின்றனர்.இது மட்டுமின்றி நாடி பார்த்து நோய் கணித்தல்,மணிக்கடை நூல் என்ற மணிக்கட்டின் (wrist ) அளவினைக் கொண்டு என்ன வகையான் நோய் என்று கணித்தல் என்று இன்னும் பல முறைகளை கூறி இருக்கின்றனர் .இவற்றில் நாடி பார்த்தல் தவிர மற்ற எவையும் எந்த முறையிலும் இல்லவை இல்லை .எனவே சைனீஸ் மருத்துவ முறைக்கும் சித்த மருத்துவத்துக்க்கும் எள்ளளவும் தொடர்பே இல்லை.



இவை மட்டுமல்லாமல் regenrative medicine என்று சொல்லப்படும் நீண்ட நாள் நோய் நொடியின்றி வாழும் முறையான காய கல்ப சிகிச்சையினை பல நூற்றாண்டுகளுக்கும் முன்பே அறிமுகப்படுத்தியப் பெருமை சித்தர்களையே சேரும். Massage therapy என்பதனை தொக்கணம்(தோல் +அணம்-தோலினை பொருந்திச் செய்யும் முறை) என்ற பெயர் கொண்டு அவற்றில் பல்வேறு முறைகளை அறிமுகப்படுத்தி நோய்க்குத்த் தகுந்தாற்போல் தொக்கணம் செய்யும் முறையினையும் தெளிவுபட எடுத்துக் கூறியவர்கள் சித்தர்களே ஆகும். ஆனால் ஆயுர்வேத மற்றும் இதர மருத்துவ முறைகளில் இதைப் போன்றதொரு தொக்கனத்தினை வகைபடுத்தி செய்யும் முறை இல்லவே இல்லை.இது போன்ற சான்றுகளின் மூலம் சித்தா மருத்துவம் எவ்வவளவு தனித்தனிமை கொண்டது என்பதனை புரிந்து கொள்ளலாம்.


மேலே உள்ள செய்திகளின் மூலம் சித்த மருத்துவம் தமிழரின் தனித்தன்மை வாய்ந்த மருத்துவம் மட்டுமின்றி ,அனைத்து சித்தர்களுமே தமிழகத்தைப் பிறப்பிடமாகக் கொண்டவர்கள் எனபதனையும் விளங்கி கொள்ளலாம்.பழனியில் சித்த மருத்துவக் கல்லூரி ஒன்று இருந்ததாகவும் அங்கு வந்து பல்வேறு நாட்டு அறிஞர்கள் சேர்ந்து சித்த மருத்துவத்தை
உருவாக்கி இருக்கலாம் என்ற கலையரசனின் முன்முடிவு மிகவும் தவறுதலானதாகும் .இதைப் போன்றதொரு செய்தி எங்குமே பதிவு செய்யப் படவில்லை.மாறாக குறைந்து 15 வருடங்களுக்கு முன்பு ஒரு அரசு சித்த மருத்துவக் கல்லூரி பழனியில் இருந்தது.அதனயே சென்னைக்கு இடமாற்றி அரும்பாக்கத்தில் உள்ள அண்ணா மருத்துவமனை வளாகத்தில் அமைத்தனர்.


எனது அடுத்தப் பதிவில் மருந்து தயாரிக்கும் முறை பற்றியும் குறிப்பாக தங்க பற்பம் குறித்த தவறான பரப்புரை பற்றிய உண்மைகளையும் பதிவிட இருக்கின்றேன்.